Föstudagur 23. apríl
Hér er viðtalið fræga við Ólaf Ragnar Grímsson, forseta Íslands, á BBC Newsnight um daginn, þar sem hann fjallaði um mögulegt Kötlugos.
Í hádeginu synti Einar Skúlason, oddviti framboðslista framsóknarmanna í Reykjavík, yfir Fossvoginn frá Kópavogi til Reykjavíkur í 3,3 gráðu heitum sjó.
Sýndi hann þar og sannaði að grannir og spengilegir menn geta synt þó nokkra vegalengd í ísköldum sjó.
Ísleifur Friðriksson og Árni Jónsson, starfsmenn ÍTR, sáu um öryggismál hans á leiðinni.
Ísleifur telur að um 10 Íslendingar geti þreytt þetta sund í svo köldum sjó um þessar mundir og að Einar sé einn af þeim.
Fimmtudagur 22. apríl
Eftir hádegi fórum við Steini í sumardagskaffi í félagsheimili Gróttu, en konur úr Kvenfélaginu Seltjörn sáu um veitingarnar.
Síðan fórum við á fjölskylduhátíð framsóknarmanna í Reykjavík í tilefni sumardagsins fyrsta.
Kl.16:30 tók ég mann í viðtal í matsal Alþingis.
Miðvikudagur 21. apríl
Kl.9 fór ég til Lilju í Greiðunni.
Kl.14 kom að fyrirspurn minni um rjúpna-, gæsa- og hreindýraveiðar á austursvæði Vatnajökulsþjóðgarðs.
Kl.14:30-16:00 var ég á ársfundi Landsspítala-Háskólasjúkrahúss(LSH) þar sem stefna sjúkrahússins til ársins 2016 var kynnt.
Kl.17 hófst glæsileg veisla heima hjá Leifi bróður í tilefni fertugsafmælis hans.
Við mamma, Gunnar Kvaran, Ingunn systir, Árni bróðir og Sigga frænka, héldum ræður fyrir hann í tilefni afmælisins.
Í dag var dreift á Alþingi fyrirspurn minni um hjúkrunarrými og heimaþjónustu.
Þriðjudagur 20. apríl
Fór í morgunkaffi á stofuna til pabba.
Kl.10:15 var fundur í heilbrigðisnefnd Alþingis þar sem Haraldur Briem, sóttvarnarlæknir, kom að minni beiðni til að upplýsa nefndina um viðbrögð vegna eldgosa.
Kl.12 var fundur forsætisnefndar Alþingis.
Í dag hefur mikið verið fjallað um yfirlýsingar forseta Íslands vegna eldgosa á Íslandi.
Hér eru tvær fréttir sem sýna þá umfjöllun.
Frétt 1 af mbl.is og frétt 2 af mbl.is.
Kl.16:00-17:30 var mín vakt á forsetastóli.
Kl.18:00-20:30 var fundur í stjórn Sundsambands Íslands.
Þaðan fór ég á fund framsóknarmanna í Hafnarfirði þar sem rætt var um komandi sveitarstjórnarkosningar.
Fundinum lauk um kl.23.
Hér er framboðslisti framsóknarmanna í Hafnarfirði sem samþykktur var á mánudaginn síðasta.
Mánudagur 19. apríl
Kl.11-16 var þingflokksfundur framsóknarmanna haldinn á flokksskrifstofunni á Hverfisgötunni.
Tveir gestir komu á fundinn, þeir Ágúst Karlsson, efnafræðingur sem fjallaði um umhverfisvæna orku og Ármann Höskuldsson, jarðfræðingur, en hann fylgist með eldgosinu í Eyjafjallajökli um þessar mundir.
Kl.20 hófst fundur fulltrúaráðs framsóknarmanna í Kópavogi, en á fundinum var gengið frá framboðslistanum fyrir komandi sveitarstjórnarkosningar.
Sunnudagur 18. apríl
Dagurinn nýttist að hluta til í að undirbúa afmælisgjöf fyrir Leif bróður.
Fór líka í góða göngu um Suðurnesið.
Laugardagur 17. apríl
Kl.11 var morgunkaffifundur framsóknarmanna að Digranesvegi 12 í Kópavogi.
Síðan hringdi ég til Noregs og aflýsti fyrirlestri sem ég átti að halda þar í lok næstu viku vegna óvissu um flugferðir vegna eldgossins.
Seinni partinn fórum við Hákon og Sindri í Borgarleikhúsið að hlusta á upplestur á skýrslu rannsóknarnefndarinnar um bankahrunið.
Dagurinn nýttist líka í að lesa gögn og færa salatplönturnar í stærri potta.
