Föstudagur 29. febrúar

Kl.12:15-13:30 var fundur í Rótarýklúbbi Seltjarnarness.

Skrapp síðan upp á Fjölva í tengslum við tímaritsgrein.

Seinni part dags undirbjó ég mig fyrir Kastljós kvöldsins.

Kl.18:30 vorum við Bjarni Benediktsson, alþingismaður, að ræða fréttir vikunnar ásamt Jóhönnu Vilhjálmsdóttur í Kastljósinu í rúv-sjónvarpi.

Ræddum við um efnahagsmál, feðrunarmál, transfitusýrur, Eurovision og fleira.

Um kl.20 fór ég í þingveisluna svokölluðu á Hótel Sögu. 

Fimmtudagur 28. febrúar

Kl.9:30-10:50 var skemmtilegur stjórnmálafundur í Flensborg í Hafnarfirði þar sem fulltrúar stjórnmálaflokkanna mættu og ræddu við nemendur.

Fundurinn var hluti af dagskrá þemadaga í skólanum.

Þema þessara daga er sjórinn eins og sjá mátti af flottum skreytingum í andyri skólans.

Rétt fyrir hádegi hélt ég ræðu fyrir hönd framsóknarmanna um frumvarp til laga um alþjóðlega þróunaraðstoð Íslands.

Eftir hádegi tók ég þátt í umræðum um friðargæslu okkar í Afganistan.

Var síðan í þinginu fram að kvöldmat.

Í gær kynnti heilbrigðisráðherra þá fyrirsjáanlegu niðurstöðu að byggja á upp nýtt sjúkrahús, Landspítala-háskólasjúkrahús(LSH),  við Hringbraut eins og að hefur verið stefnt í tíð síðustu ríkisstjórnar.

Ríkisstjórnin með heilbrigðisráðherra í broddi fylkingar hefur tafið uppbyggingu sjúkrahússins með bæði nefndarstarfinu og niðurskurði á fjáveitingum til verkefnisins.

Töfin mun líklega kosta skattgreiðendur að lágmarki 3 milljarðar króna.

Töfin gæti kostað meira ef ríkisstjórnin tefur verkefnið enn frekar en orðið er.

Af þessu tilefni skrifaði ég þennan pistil" Ríkisstjórnin tefur uppbyggingu LSH".

Miðvikudagur 27. febrúar

Í gær kom fram í fréttum rúv-sjónvarps að ríkisstjórnin hefði lagt fram sjónarmið sín um hvað Ísland myndi leggja áherslu á í samningslotunni sem nú er að hefjast um næsta skuldbindingartímabil Kyoto-bókunarinnar.

Ríkisstjórnin er greinilega í bullandi vandræðum miðað við fréttina.

Af því tilefni skrifaði ég pistilinn "Ríkisstjórnin treður marvaðann í loftslagsmálunum".

Kl.8:30-10:10 var fundur í allsherjarnefnd Alþingis.

Kl.10:15-12:00 fundur í utanríkismálanefnd Alþingis.

Í hádeginu mætti Dagný Jónsdóttir, fyrrum alþingismaður með nýfæddri dóttur sinni í heimsókn á Alþingi.

Kl.13:30 hóst fundur á Alþingi með umræðum um störf þingsins þar sem Sigfús A. Karlsson, varaþingmaður Framsóknarflokksins, tók upp mál íbúðalánasjóðs.

Við Guðni Ágústsson tókum einnig þátt í umræðunum fyrir hönd framsóknarmanna.

Kl.15:30 var fundur þingflokksformanna ásamt forseta Alþingis.

Kl.16-18 var fundur þingflokks framsóknarmanna á Alþingi.

Þriðjudagur 26. febrúar

Kl.7:30 vorum við Árni Páll Árnason, alþingismaður, í viðtali hjá Sveini Helgasyni á Rás 1 í Rúv að ræða um m.a. sjálfstæði Kosovo, framboð Íslands í Öryggisráð Sameinuðu þjóðanna og loftslagsmál.

Hér er slóð á upptökuna á ruv.is.

Fór síðan í morgunkaffi á stofuna til pabba.

Kl.12 er fundur í allsherjarnefnd Alþingis.

Í dag birtist grein mín "Mótorhjól og útivist" í blaðinu 24 stundir.

Hér er pistill um furðusvar umhverfisráðherra vegna kortlagningu vega og slóða á hálendinu.

Ég hlýt af efast um að ráðherrann lesi eigin svör sem gefin eru þinginu miðað við þær röngu upplýsingar sem í því eru gefnar.

Í gær var dreift á Alþingi þingsályktunartillögu minni og meðflutningsmanna um að settar verði reglur um hámarksmagn transfitusýra í matvælum á sama hátt og Danir hafa gert.

Transfitusýra, eða hert fita,  er afar skaðleg því hún eykur verulega áhættu á æða- og hjartasjúkdómum auk offitu og sykursýkis 2.

Árið 2002 neyttum við Íslendingar að meðaltali  3,5 gr transfitusýra á dag, en Alþjóðaheilbrigðismálastofnunin mælir með að ekki verði neytt meira en 2g. á dag af henni.

Meðaltalshlutfallið okkar er því of hátt og ljóst að fjöldi Íslendinga er að innbyrða allt of mikið magn transfitusýra.

Kl.17 var mjög jákvæð og skemmtileg athöfn í Þjóðmenningarhúsinu þar sem Fréttablaðið veitti svokölluð samfélagsverðlaun.

Kl.20-23 var aðalfundur Jöklarannsóknarfélags Íslands(JÖRFÍ).

Á dagskrá voru hefðbundin aðalfundarstörf og síðan myndasýning Finns Pálssonar.

Kl.11 hófst fundur í allsherjarnefnd Alþingis.

Kl.13 var fundur þingflokksformanna og forseta Alþingis þar sem við ræddum þingstörf vikunnar.

Kl.13:30-15:00 var þingflokksfundur framsóknarmanna á Alþingi.

Kl.15 hófst fundur á Alþingi á óundirbúnum fyrirspurnum til ráðherra.

Skrapp heim seinni part dags.

Kl.19 var ég í þinginu og tók stuttlega þátt í umræðunum.

Kl.20:00-21:15 var fundur í allsherjarnefnd Alþingis.

Sunnudagur 24. febrúar

Eftir að við Steini vorum búin að ganga frá húsinu lögðum við af stað suður.

Á leiðinni stoppuðum við í kaffi í Grafargerði, rétt sunnan Hofsóss, hjá Unni og Magnúsi nágrönnum okkar á Seltjarnarnesi.

Sýndu þau okkur fjöruna sína og hluta jarðarinnar sem hin er öll hin glæsilegasta.

Heimleiðinni gekk vel enda veður bjart og fallegt.

Vorum við komin heim um kl.19:30.

Laugardagur 23. febrúar

Fyrir hádegi skrapp ég að  horfa á hörkuspennandi blakmót kvenna og karla í íþróttahúsinu á Siglufirði.

Blakmót þessi eru árlegur viðburður og sækja mörg utanbæjarlið mótið.

Seinni part dags lá leiðin á skíði á Skíðasvæði Siglfirðinga í Skarðsdal.

Nægur snjór var á svæðinu og færið frábært.

Þrátt fyrir að hnéð á mér má muna sinn fífil fegurri frá því áður en ég krossbandsslitnaði var lítið mál að skíða sig vel heita í brekkunum á Sigló.